Fact-check _ TawNaw FM / The Red Flag/ MFCN
10 Nov 2025
NP news Youtube ချန်နယ်မှာ ငဇွဲနဲ့တာဘော ထိုင်းထွက်ပြေးလို့ PDF တွေကြောင်ပျောက်ဆိုတဲ့ခေါင်းစဉ်နဲ့ တင်ဆက်ခဲ့တဲ့သတင်းဟာ မှားယွင်းချိတ်ဆက်ထားတဲ့ သတင်းမှားဖြစ်ကြောင်းကို တောနော်က စိစစ်ထားပါတယ်။
အောက်တိုဘာ ၁၉ ရက်မှာ စစ်တပ်ဝါဒဖြန့်သတင်းသမားဖြစ်တဲ့ ကျော်မျိုးမင်းရဲ့ ချန်နယ်ဖြစ်တဲ့ NP news Youtube ချန်နယ်မှာ “ငဇွဲနဲ့တာဘော ထိုင်းထွက်ပြေးလို့ PDF တွေကြောင်ပျောက်” ဆိုတဲ့ခေါင်းစဉ်နဲ့ သတင်းကို တင်ဆက်ခဲ့ပြီး ကြည့်ရှုသူ ၈၆,၀၀၀ ကျော် Like ၂,၅၀၀ ကျော်နဲ့ မှတ်ချက်ပေးသူ ၄၀၀ ကျော်အထိရှိနေပါတယ်။
သတင်း Archive Link
သတင်းစိစစ်ချက်
Ko Zwal အကောင့်မှာ အခုလ ၁၈ ရက်မှာ ဆိုတဲ့ ”ချစ်တယ်နော် အလိုမလိုက်ဘူး တောထဲကကောင်တွေနဲ့အတူမနေချင်လို့ ဘန်ကောက်လစ်ပြီ” ဆိုတဲ့ Caption နဲ့တင်ထားတဲ့ Post ကြောင့် NPnews က အခုလိုပြောဆိုခဲ့တာဖြစ်ပါတယ်။အဲဒီနေ့မှာ တင်ထားတဲ့ ဓာတ်ပုံ ပြီးခဲ့တဲ့နှစ်က ပုံအဟောင်းဖြစ်တာကိုလည်း တွေ့ရပါတယ်။
Post Link – https://shorturl.at/diDMR
အရင်တုန်းကလည်း စစ်ကောင်စီလော်ဘီချန်နယ်တွေဟာ တော်လှန်ရေးမှာ ပါဝင်လှုပ်ရှားသူတစ်ဦးဖြစ်တဲ့ ဒါရိုက်တာကိုပေါက်တင်ထားတဲ့ပုံးဟောင်းတစ်ပုံကို ခုလိုမျိုးပဲ ဂျပန်ကိုထွက်ပြေးသွားပြီဆိုပြီးလည်း ပြောခဲ့ပါသေးတယ်။
အဲဒီစွပ်စွဲချက်တွေအပြင် ကော်ဘရာစစ်ကြောင်းမှူးဗိုလ်တာဘော၊ ဗိုလ်အယ်စေးဝါးနဲ့ KNLA ဒုစစ်ဦးစီးချုပ် ဗိုလ်ကြီးဘောကျော်ဟဲတို့ကိုလည်း ပုတ်ခတ်ပြောဆိုထားပါတယ်။
နောက်တစ်ချက်ကတော့ ကျော်မျိုးမင်းဟာ ကေအဲန်ယူဟာ စစ်မတိုက်ဘဲ PDF ရဲဘော်တွေကို ရှေ့တန်း သွားခိုင်းပြီး အနောက်ကခေါင်းဆောင်တွေထွက်ပြေးသွားတာ၊ ကျည်ထောက်ပံ့မှု မပေးတာတွေကိုလည်း ထည့်ပြောထားတာကို တွေ့ရပါတယ်။
စစ်ကြောင်းတပ်ဖွဲ့ဝင်တစ်ဦးကတော့ “ဗိုလ်တာဘောတို့ ဗိုလ်အယ်စေးဝါးတို့ တကယ်ပြေးမပြေး၊ မြေပြင်က စစ်ဆင်ရေးမှတ်တမ်းတွေ လိုင်းပေါ်မှာ ပလူပျံအောင်ရှိပါတယ်။ ရှေ့ဆုံးကဦးဆောင်နေတဲ့ ခေါင်းဆောင်တွေဆိုတာ ထင်ရှားပါတယ်။ သူတို့အသက်ထက် သိက္ခာကို ပိုအလေးအနက်ထားတဲ့ ခေါင်းဆောင်ကောင်းတွေမို့လို့ ဘယ်လိုအခြေအနေမျိုးမှာပဲဖြစ်ဖြစ် ရဲဘော်တွေကို ထားခဲ့ပြီး ထွက်ပြေးမဲ့ ခေါင်းဆောင်တွေမဟုတ်ပါဘူး” လို့ တောနော်ကိုပြောပါတယ်။
ကေအဲန်ယူအုပ်ချုပ်နယ်မြေမှာရှိတဲ့ တော်လှန်ရေးတပ်ဖွဲ့တွေဟာ NUG MOD ဖွဲ့စည်းပုံအရ ERO နဲ့ MODပူးပေါင်းဖွဲ့စည်းထားတာဖြစ်လို့ KNLA/PDF ပူးပေါင်းစစ်ကြောင်းတွေဖြစ်ပါတယ်။
တော်လှန်ရေးတပ်သားတွေမှာ MOD ရဲ့ကိုယ်ပိုင်နံပါတ်ကျထားပြီဖြစ်တာကြောင့် KNU ကိုယ်ပိုင်နံပါတ်ရော PDF ကိုယ်ပိုင်နံပါတ်ပါ ရထားပါတယ်။
“ PDF တွေကိုပဲ ရှေ့ကစစ်တိုက်ခိုင်းတယ် ဆိုတာ PDF နဲ့ Eaos တွေကြား သွေးခွဲဖို့ သူတို့လုပ်နေကျ ဝါဒမှိုင်းတစ်ခုပါပဲ” လို့ အထက်ပါရဲဘော်က ပြောပါတယ်။
ဗိုလ်တာဘောဦးဆောင်တဲ့ ကော်ဘရာစစ်ကြောင်းနဲ့ရှေ့တန်းစစ်မြေပြင်မှာ ပါဝင်ခဲ့တဲ့ တပ်သားတစ်ဦးကတော့ ကေအဲန်ယူနယ်မြေမှာရှိနေတဲ့ PDFတပ်သားတွေဟာ ကေအဲန်ယူရဲ့ စည်းမျဉ်းစည်းကမ်းအရလိုက်နာရပြီး အဖွဲ့တွေထဲမှာကရင်၊ မွန်တွေလည်းရှိပြီး PDF အဖွဲ့သားတွေက ပိုများတယ်လို့ပြောပါတယ်။
“ ကေအဲန်ယူအဖွဲ့က စစ်ဗျူဟာမှာအတွေ့အကြုံရှိတယ်၊ ဒါပေမဲ့ PDF တွေကျတော့ တအားကို လုပ်ရဲကိုင်ရဲတယ်၊ စိတ်တအားပြင်းပြတယ်၊ ကျွန်တော်တို့ ကျိုက်ဒုံစခန်း၊ တောင်စွန်းစခန်း၊ စုကလိတို့တိုက်တုန်းကလည်း ကော့ကရိတ်တို့ဘာတို့မှာ ဗိုလ်တာဘောတို့နဲ့သွားတဲ့အချိန်တုန်းကလည်း ရဲတာပဲ၊ ဒါပေမဲ့ သူတို့ကပြောတယ်သိပ်မရဲနဲ့ ၊ သိပ်မတိုးနဲ့ပေါ့နော် သိပ်မတိုးနဲ့ မလုပ်နဲ့လို့၊ သူတို့ပြောတာက ကိုယ့်အသက်ဘေးလည်းရှိသေးတယ်လေ၊ တိုက်ပွဲမှာကရင်တွေကျတော့ မရှိတာမဟုတ်ဘူး၊ နည်းတယ်၊ နည်းတယ်ဆိုတာက တခြားနေရာတွေလိုက်ပို့ရတာရှိတယ်၊ တခြားနေရာတွေနဲ့ ခွဲပြီးတိုက်ခိုက်ရတာတွေလည်းရှိတယ်” လို့ သူကပြောပါတယ်။
ပြီးခဲ့တဲ့နှစ်က ကော့ကရိတ်တောင်ပိုင်းရှေ့တန်းစစ်မြေပြင်တစ်နေရာကို တောနော်ကိုယ်တိုင် သွားရောက်လေ့လာရာမှာလည်း PDF တပ်သားတွေနဲ့ KNLA တပ်သားတွေ အတူရှေ့တန်းမှာ နေရာယူထားတာကိုတွေ့ခဲ့ရပါတယ်။
ကေအဲန်ယူတပ်မဟာ ၅ ရဲ့ဗျူဟာမှူးဖြစ်တဲ့ ဗိုလ်မှူးကြီး စောထူးကရှော(ဗိုလ်တိုး) ဟာ ( ၂၈-၄-၂၀၂၂) မှာ ရှေ့တန်းတစ်နေရာမှာ တိုက်ပွဲဝင်ရင်းကျဆုံးသွားခဲ့ပါတယ်။ သူဟာ နယ်မြေထဲကိုရောက်လာတဲ့ တော်လှန်ရေးရဲဘော်တွေအတွက်သာမက မြို့ပြပျောက်ကြား (UG) တွေကိုလည်း အကူအညီတွေ များစွားပေးခဲ့သူတစ်ဦးဖြစ်ပါတယ်။
75th Karen Martyrs’ Day ဆိုတဲ့ Facebook စာမျက်နှာမှာ အာဏာသိမ်းကာလနောက်ပိုင်း အကြမ်းဖက်စစ်ကောင်စီတပ်ဖွဲ့တွေကို တိုက်ခိုက်ရင်း ကျဆုံးသွားခဲ့တဲ့ KNLA ရဲဘော်တချို့ရဲ့ ပုံတွေကိုလည်း ဒီနှစ် ကရင်အာဇာနည်နေ့မှာ ဂုဏ်ပြုမှတ်တမ်းတင်ဖော်ပြခဲ့ပါတယ်။
လင့်ခ်များ
သုံးသပ်ချက်
NP news Youtube ချန်နယ်မှာ ငဇွဲနဲ့တာဘော ထိုင်းထွက်ပြေးလို့ PDF တွေကြောင်ပျောက်ဆိုတဲ့ခေါင်းစဉ်နဲ့ တင်ဆက်ခဲ့တဲ့တင်းဟာ သတင်းမှား ဖြစ်ပါတယ်။
ကေအဲန်ယူက PDF တွေကိုပဲစစ်တိုက်ခိုင်းပြီး နောက်ကခေါင်းဆောင်တွေထွက်ပြေးသွားတယ်ဆိုတဲ့ ပြောဆိုချက်ကလည်း သက်သေအထောက်အထားမပါဘဲ တော်လှန်ရေးတပ်ဖွဲ့တွေကြား သွေးထိုးလှုံ့ဆော်ထားတာပဲဖြစ်ပါတယ်။
အာဏာသိမ်းစစ်တပ်ဟာ သူတို့ကိုတော်လှန်နေတဲ့ တော်လှန်ရေးတပ်ဖွဲ့တွေအချင်းချင်းကြား သွေးထိုးလှုံ့ဆော်မှုတွေဆက်တိုက်ပြုလုပ်ခဲ့သလို့ ပြည်သူလူထုတွေကိုလည်း ဝါဒဖြန့်သတင်းမှားတွေ ဆက်တိုက် ပျံ့နှံစေခဲ့ပါတယ်။
အခုလို ဆိုရှယ်မီဒီယာပေါ်မှာ ဝါဒဖြန့်ဖို့၊ ကိုယ်ကျိုးရှာဖို့ရည်ရွယ်ပြီး သတင်းတု သတင်းမှားတွေကို ရည်ရွယ်ချက်ရှိရှိ ဖြန့်ဝေမှုတွေ ရှိတာကြောင့် အလွယ်တကူမယုံကြည်ဖို့လိုအပ်ပါတယ်။
စာဖတ်သူတွေအနေနဲ့ သတင်းတု/သတင်းမှားဖြစ်တယ်လို့ သံသယရှိရင်ပဲဖြစ်ဖြစ်၊ မှန်ကန်တဲ့သတင်း ဟုတ်၊ မဟုတ်အတည်ပြု မေးမြန်းလိုရင်ပဲဖြစ်ဖြစ်၊ Fact Checking ပြုလုပ်ပေးတဲ့ သတင်းဌာန/အဖွဲ့အစည်း တွေရဲ့ Chat Box ကနေ သွားရောက်မေးမြန်းကြဖို့ တိုက်တွန်းလိုပါတယ်။
Myanmar Fact-checking Network အဖွဲဝင်တွေ အချက်အလက်စစ်ဆေးထားတဲ့ သတင်းတွေကို ဒီနေရာမှာ ဝင်ရောက်ဖတ်ရှုနိုင်ပါတယ်။
Tawnaw FM ကို အောက်ဖော်ပြပါ စာမျက်နှာတွေမှာလည်း ကြည့်ရှုနိုင်ပါတယ်။
Website – www.tawnawfm.com
Telegram – https://t.me/tawnawfm
Youtube – https://shorturl.at/ksHUV
